Luke 12

Izixwayiso Lezikhuthazo

1Ngalesosikhathi, sekubuthene isixhobexhobe sezinkulungwane zabantu, sebenyathelana, uJesu waqala wakhuluma kubafundi bakhe esithi, “Qaphelani imvubelo yabaFarisi, iyikuzenzisa. 2Kakukho okufihliweyo okungakubekwa obala, lokuthukuziweyo okungayikudalulwa.

3Lokho okukhulume emnyameni kuzazwiwa emini lithe bha, lalokho obukunyenyezela endlebeni ezindlini zangaphakathi kuzamenyezelwa phezulu kophahla lwezindlu.

4“Ngiyalitshela, bazalwane, lingabesabi labo ababulala umzimba kungabikhona okunye abangakwenza ngemuva kwalokho. 5Kodwa ngizalitshengisa lowo okumele limesabe: Mesabeni lowo, othi esebulele umzimba, abe lamandla okuphosela esihogweni. Yebo, ngiyalitshela, mesabeni. 6Izintaka ezinhlanu kazithengiswa ngezindibilitshi ezimbili na? Kodwa kayikho lanye yazo uNkulunkulu ayilibalayo.

7Ngempela, izinwele zekhanda lakho zibaliwe. Lingesabi; lina liligugu okudlula izintaka ezinengi.

8“Ngiyalitshela, lowo ongivumayo phambi kwabantu iNdodana yoMuntu layo izamvuma phambi kwezingilosi zikaNkulunkulu. 9Kodwa lowo ongiphikayo phambi kwabantu uzaphikwa phambi kwezingilosi zikaNkulunkulu. 10Wonke umuntu okhuluma kubi ngeNdodana yoMuntu uzathethelelwa, kodwa lowo ohlambaza uMoya oNgcwele akayikuthethelelwa.

11“Uma limiswa phambi kwamasinagogi, laphambi kwababusi labaphathi lingazihluphi ngokuthi lizazilamulela lithini, kumbe lizakhuluma kuphi, 12ngokuba uMoya oNgcwele uzalifundisa ngalesosikhathi lokho elifanele likutsho.”

Umzekeliso Wesinothi Esiyisiwula

13Omunye emphakathini wathi kuye, “Mfundisi, tshela umfowethu ukuthi angabele lami ilifa.”

14UJesu waphendula wathi, “Ndoda, ngibekwe ngubani ukuba ngumahluleli kumbe umlamuli wenu?”

15Wasesithi kubo, “Qaphelani! limukani yonke imihlobo yobuhaga; isiqokoqela sempilo yomuntu kasikho ebunengini benotho yakhe.”

16Wasebatshela umzekeliso lo: “Insimu yenye indoda eyayinothile yaphuma inala enkulu.

17Wasenakana wathi, ‘Kambe ngenzeni? Angilandawo yokubeka amabele ami.’

18“Wasesithi, ‘Nanku engizakwenza. Ngizazidiliza iziphala zami ngakhe ezinkulu kulazo, besengithela khona wonke amabele ami kanye lezinye izimpahla zami. 19Ngizazitshela ngithi, “Usulezinto ezinengi ezinhle ezizakwanela iminyakanyaka. Ikholise manje impilo; dlana, unathe uthokoze.” ’

20“Kodwa uNkulunkulu wathi kuye, ‘Wena siwula ndini! Ngabona lobu ubusuku impilo yakho izathathwa. Pho ngubani ozazuza lokhu obusuzilungisele khona na?’

21“Yikho lokhu okuzakwenzeka kulowo ozibekela inotho kodwa enganothanga kuNkulunkulu.”

Lingakhathazeki

22UJesu wasesithi kubafundi bakhe: “Ngakho ngilitshela ukuthi lingakhathazeki ngokuphila kwenu, ukuthi lizakudlani; kumbe ngomzimba wenu, ukuthi lizagqokani. 23Impilo iyakudlula ukudla, lomzimba uyazidlula izambatho. 24Ake likhumbule ngamawabayi: Kawahlanyeli kumbe avune, kawalasiphala; kodwa uNkulunkulu uyawapha ukudla. Manje lina liqakatheke okudlula izinyoni! 25Ngubani kini ongathi ngokukhathazeka engeze ihora elilodwa empilweni yakhe na? 26Manje, uma lingake liyenze into le encinyane kangaka, lizihluphelani na ngokunengi?

27“Ake libone ukuthi amaluba akhula njani. Kawasebenzi kumbe eluke. Kodwa ngiyalitshela ukuthi laye uSolomoni ebukhazikhazini bakhe kazange acece njengawo. 28Aluba uNkulunkulu ececisa kanjalo utshani beganga, obukhona namuhla, kusasa sebuphoselwa emlilweni, kambe uzalicecisa kanganani lina, hawu lina bokukholwa okuncinyane! 29Lingazihluphi ezinhliziyweni zenu ukuthi lizakudlani kumbe lizanathani; lingakhathazeki ngalokho. 30Ngoba umhlaba wabezizwe uxotshana lezinto ezinjalo, ikanti uYihlo uyazi ukuthi liyaziswela. 31Kodwa funani umbuso wakhe, izinto zonke lezi lazo lizaziphiwa.

32“Lingesabi, mhlambi omncane, ngoba uYihlo uthandile ukulipha umbuso. 33Thengisani izimpahla zenu liphe abampofu. Zidingeleni izikhwama ezingagugiyo, inotho ezulwini engayikuphela, lapho okungasondeli khona isela lalapho impehlane ingabhubhisi khona. 34Ngoba lapho okulenotho yakho khona, inhliziyo yakho ilapho layo.

Ukuhlala Ulindile

35“Gqokani lilindele inkonzo, izibane zenu zihlale zibhebha, 36njengamadoda elindele inkosi yawo ukuba ibuye edilini lomthimba, ukuze kuthi nxa ifika iqoqoda aphange ayivulele umnyango.

37Kuzakuba kuhle kulezozinceku inkosi yazo ezifica zilindile nxa ifika. Ngilitshela iqiniso ukuthi yona izagqokela ukubadekela, bona bahlale beyame etafuleni, yona ibadekele. 38Kuzakuba kuhle kulezo zinceku inkosi yazo ezazifica zilindile loba ingabe ifika ngomlindo wesibili loba owesithathu ebusuku. 39Kodwa zwisisani lokhu: Aluba umninindlu ubesazi ukuthi isela lizafika ngasiphi isikhathi ubengasoze ayekele indlu yakhe igqekezwe. 40Lani hlalani lilindile ngokuba iNdodana yoMuntu izafika ngesikhathi elingayilindelanga ngaso.”

41UPhethro wabuza wathi, “Umzekeliso lo uwuqondise kithi thina kumbe ebantwini bonke na?”

42INkosi yaphendula yathi, “Nguwuphi kambe umphathi othembekileyo lohlakaniphileyo, othi inkosi yakhe imbeke ukukhangela izisebenzi zayo ukuba aziphe isabelo sazo sokudla ngesikhathi esifaneleyo na? 43Kuzakuba kuhle kuleyo nceku inkosi eyifica isenza njalo ekubuyeni kwayo.

44Ngilitshela iqiniso ukuthi, izambeka ukuthi aphathe yonke impahla yayo.

45Kodwa uma inceku leyo ingathi ngenhliziyo, ‘Inkosi yami isiphuzile ukubuya,’ ibisiqalisa ukutshaya izisebenzi zesilisa lezesifazana ibisisidla, ibisinatha idakwe. 46Inkosi yaleyonceku izabuya ngosuku ingayilindelanga langesikhathi engasaziyo. Izayiquma iziqa, iyabele indawo labangakholwayo.

47“Leyonceku ethi ikwazi okufunwa yinkosi yayo kodwa ingalindi kumbe ingalungisi lokho inkosi yayo ekufunayo izatshaywa okuzwayo.

48Kodwa kulowo ongaziyo owenza izinto eziholela ekubhujisweni uzatshaywa kalutshwana. Kulowo ophiwe okunengi, okunengi kuzafuneka kuye; lakulowo owethenjwe ngokunengi, okunengi kulalokho kuzafuneka.

Hatshi Ukuthula Kodwa Ukudabukana

49“Ngilande ukuzalumathisa umlilo emhlabeni, ngizengifise sengathi ngabe uvele usungunguma! 50Kodwa ngiselobhaphathizo okusamele ngilungene, kodwa ngikhathazekile kakhulu kuze kugcwaliseke lokho! 51Licabanga ukuthi ngalanda ukuletha ukuthula emhlabeni na? Hatshi, zwanini, kodwa ukudabukana. 52Kusukela manje bazakuthi bebahlanu emulini badabukane, abathathu bexabana lababili, lababili bexabana labathathu. 53Bazadabukana, uyise axabane lendodana, indodana ixabane loyise, unina lendodakazi, indodakazi ixabane lonina, uninazala axabane lomalokazana, umalokazana loninazala.”

Ukuzwisisa Izikhathi

54Wathi exukwini labantu: “Lithi lingabona iyezi liqhamuka entshonalanga liphanga lithi, ‘Izulu lizakuna,’ lakanye line. 55Kuthi kungavunguza umoya weningizimu lithi, ‘Kuzatshisa,’ lakanye kube njalo. 56Bazenzisi! Liyakwazi ukuchaza izibonakaliso zomhlaba lezomkhathi. Kungani pho lingakwazi ukuchaza isikhathi lesi esikuso na?

57“Kungani kanti lingaziboneli lina ngokwenu okuyikho okulungileyo na? 58Nxa uhamba lommangaleli wakho lisiya kumahluleli, zama ngamandla ukuthi liqedelane lisesendleleni, funa akudonsele kumahluleli, lomahluleli abesekudlulisela enxuseni lona inxusa likuthele entolongweni. 59Ngiyalitshela, kawusoze uphume uze uqale ubhadale du kungasali kanye lendibilitshi.”